Belgiýa Patyşalygynyň Türkmenistandaky Ilçisi ynanç hatlarynyň nusgalaryny gowşurdy

2024-nji ýylyň 10-njy dekabrynda Türkmenistanyň Daşary işler ministrliginde ministriň orunbasary Ahmet Gurbanow bilen Belgiýa Patyşalygynyň Türkmenistandaky täze Adatdan daşary we Doly ygtyýarly Ilçisi (oturýan ýeri Baku ş.) Žülýen de Freponyň arasynda duşuşyk geçirildi. Ilçi özüniň ynanç hatlarynyň nusgalaryny gowşurdy.

Söhbetdeşligiň barşynda Türkmenistan bilen Belgiýanyň arasyndaky ikitaraplaýyn syýasy-diplomatik, söwda-ykdysady we medeni-ynsanperwer gatnaşyklaryň esasy ugurlary we geljegi ara alnyp maslahatlaşyldy.

Taraplar halkara düzümleriň, hususan-da BMG-niň, ÝB-niň we beýlekileriň ugry boýunça özara gatnaşyklaryň ýola goýlan mehanizminiň çäklerinde halkara meýdançalarynda ýurtlaryň başlangyçlaryny we tekliplerini özara goldamak barada ylalaşdylar.

Netijeli we oňyn hyzmatdaşlygy ösdürmäge meýillidigini nygtamak bilen, türkmen tarapy Ilçiniň täze wezipesinde zerur bolan ähli goldawy we ýardamlary bermäge taýýardygyny beýan etdi.